俾個機會潮友你，數三樣關於上水嘅事與物，你嘅答案係..？ PND嘅答案係小店、大水管同...菠蘿蛋。
上水嘅潮友，帶住PND穿過一個個商場行到嚟石湖墟市政大廈，成層都好多常餐、碟頭飯、燒味...，係，你地一定知，呢度對我嚟講係個陌生度達80%嘅地方。
潮友推介佢由細食到大嘅呢間小店同老闆明叔，佢地嘅飯係唔錯，但通常嚟呢度都係食「菠蘿蛋」，原居民又講喇：夠彬記好味？唉佢唔喺度喇... 🍍🍍🍍🍍🍍🍍🍍🍍🍍🍍🍍🍍🍍🍍想懷愐過去嘅石湖墟，除咗廣成，就試埋呢度無真菠蘿嘅《菠蘿蛋》$12啦！上一代嘅創意值幾錢？菠蘿包中心應該加咗少量牛油，烘得幾熱，最唔同嘅係佢俾一塊熱熱嘅蛋皮卷住包住，蛋皮係薄身嘅，且全熟，流心玉子？以前係唔興嘅，驚有菌。可取嘅係包身與蛋之間夾心層嘅菠蘿釘仲係微微香香脆脆，甜甜地、香口、有蛋香。
佢杯凍奶茶少冰都好正，茶味香濃，唔知係咪成層熟食嘅奶茶都咁好飲，但呢度嘅奶茶同樽仔奶茶有得比！下午茶，搞掂！
十幾廿年前嚟講，菠蘿蛋嘅地位應該相當於今日嘅分子甜品？明叔，如果你睇到嘅話，蛋煎得厚身啲再香口啲，個包再加多片大牛油，一定very骨！加油！
明記
星期一至日 06:00-17:30
#PND上水 #PND港式 #PND小食
@上水石湖墟市政大廈2樓10號舖
鳴謝潮友 Wing 溫馨推介
Search